خاموشی سے ادا ہو رسمِ دوری، کوئی ہنگامہ برپا کیوں کریں ہم۔۔؟
یہ کافی ہے کہ ہم دشمن نہیں ہیں، وفاداری کا دعوٰی کیوں کریں ہم۔۔؟
وفا ، اخلاص ، قربانی ، محبت، اب ان لفظوں کا پیچھا کیوں کریں ہم۔۔؟
ذلیخٰۂ عزیزہ ، بات یہ ہے، بھلا گھاٹے کا سودا کیوں کریں ہم۔۔؟
ہماری ہی تمنّا کیوں کرو تم؟ تمہاری ہی تمنّا کیوں کریں ہم۔۔؟
کیا تھا عہد جب لمحوں میں ہم نے، تو ساری عمر ایفا کیوں کریں ہم۔۔؟
اٹھا کر کیوں نہ پھینکیں ساری چیزیں؟ فقط کمروں میں ٹہلا کیوں کریں ہم۔۔
نہیں دنیا کو جب پرواہ ہماری، تو پھر دنیا کی پرواہ کیوں کریں ہم۔۔؟
گر آنا ہے سرِ بازار تو کیا؟ بھلا اندھوں سے پردہ کیوں کریں ہم۔۔؟
چبا لیں کیوں نہ خود ہی اپنا ڈھانچا، تمہیں دانتن مہیا کیوں کریں ہم۔۔؟
پڑی رہنے دو انسانوں کی لاشیں، زمیں کا بوجھ ہلکا کیوں کریں ہم۔۔؟
یہ بستی ہے مسلمانوں کی بستی، یہاں کارِ مسیحا کیوں کریں ہم۔۔؟
0 Comments